Tirana–Partizani, derbi që s’është kurrë miqësor

[Semiramida]

Tensioni beri ligjin te merkuren, si ne fushe, ashtu edhe në shkallët e “Selman Stërmasi”. Lila shënoi me penallti (21’) për bardheblutët, kurse për të kuqtë barazoi Capa në të 73’ .



Tensioni dhe rivaliteti tepër i ndjerë nder vite ka mbizotëruar në një Tirana-Partizani, që pavarësisht kontekstit miqësor, paqësore s’ka qenë fare. Vërtet rezultati ka sjellë një barazim 1-1 në sfidën e zhvilluar të mërkurën në “Selman Stërmasi”, ku mbrojtësi Andi Lila shënoi me penallti (21’) për bardheblutë e Ilija Lonçareviçit, ndërkohë që për të kuqtë e Eduard Zhupës barazoi në të 73’ zëvendësuesi Arbër Capa. Megjithatë për t’u vecuar më tepër ka qenë nervozizmi i lojtarëve në tapetin e gjelbërt, duke lënë të kuptohet se më shumë takimi ka qenë një ceshtje “mërish të vjetra”. Jo më kot gjyqtari i takimit, ndërkombëtari Sokol Jareci, ndëshkoi me karton të kuq, fillimisht Sabien Lilajn e Tiranës për një reagim të ekzagjeruar pas një dueli me Cekën. Ndërsa më pas ishte radha e Ardit Beqirit të Partizanit, i cili i provokuar nga francezi Mohalebi e ka goditur ate me shuplakë në fytyrë.

Një sfidë më vete ka qenë edhe ajo midis dy tifozerive, që paralelisht me lojën e skuadrave, s’kanë kursyer kunjat e ofendimet reciproke. Tonet kanë mbërritur deri aty sa për pak nuk ka pasur edhe fërkime direkte midis dy palëve, ndonëse gjithcka ka qenë nën kontrollin e forcave të rendit.

Ky ishte barazimi i tretë në pesë miqësore për Partizanin, skuadër që sezonin e ardhshëm merr pjesë në Kategorinë e Parë, aventurë që do ta nisë kundër Bilisht Sportit.. Tirana, më 16 gusht do të luajë finalen e Superkupës kundër Flamurtarit. Takimi u ndoq edhe nga trajneri i Kombëtares, Josip Kuzhe, i cili pa nga afër lojën e mbrojtësit Lila dhe mesfushorit Sefa, të dy të thirrur për ndeshjen miqësore kundër Qipros, më 12 gusht. Derbi i madh i kryeqytetit, ndërkaq, do t’i mungojë kampionatit shqiptar të paktën për një sezon, cka shihet si një humbje e madhe për përplasjet (edhe si ato te se merkures) që kanë dhuruar gjithmonë ndër vite.




Rezultatet e miqësoreve të skuadrave të Kategorisë Superiore:

Tirana-Partizani 1-1

Flamurtari-Lushnja 6-1

Dinamo-Makedonia 1-2

Kastrioti-Dajti 1-0

Teuta-Pogradeci 3-0